झापा । झापाको भद्रपुर नगरपालिकाले यो वर्ष २६ वटा आवास निर्माण गरिदिने भएको छ । नगर प्रमुख सन्थाल आवास निर्माण अन्तरगत नगरपालिकाको योजनामा आवास निर्माण गरिदिने भएको हो ।
नगरपालिकाले बुधबार एक कार्यक्रमको आयोजना गरी आवास निर्माणको सिलान्यास गरेको छ । नगर प्रमुख गणेश पोखरेल, प्रमुख प्रशासकीय अधिकृत सुनिल निरौला, वाडअध्यक्ष, घरधनीलगायतले संयुक्त रुपमा सिलान्यास गरेका थिए । नगरले वडा नम्बर ३ का लाल हस्दाको पहिलो र वडा नम्बर ९ का चुड्कु किस्कुको आवासको दोस्रो सिलान्यास गरेकाे थियो ।
नगरभित्र वडा नम्बर ३ ,५, ९ र १० मा प्रत्येक वाडमा ५ का दरले २० वटा आवास निर्माण हुनेछन् भने वडा नम्बर ७ मा ६ वटा गरी यो वर्ष २६ वटा आवास निर्माण हुने नगरका इन्जीनीयर योगोन्द्र रञ्जितकारले जानकारी दिए । विनियोजित २ करोड रुपैयाँको लागतमा निर्माण हुने आवासमा प्रति आवास भ्याटसहित ४ लाख ८९ हजार ३ सय ४२ रुपैयाँ ८१ पैसामा स्नेहा निर्माण सेवा भद्रपुर– १० ले ठेक्का लिएको उनले जनाए । आगामी ०८१ वैशाख मसान्तसम्म सम्पन्न गर्नेगरी चालु वर्षको मङ्सिर २७ गते सम्झौता भइसकेको कार्यक्रमको औचित्यमाथि प्रष्ट पार्दै उनले जानकारी गराएका थिए ।
३८४ दशमलव १३ वर्ग फिटमा भान्सा घर र बरण्डा सहित ३ वटा कोठा भएको टिनको छाना निर्माण हुने उल्लेख छ । कार्यपालिकाको निर्णयबाट लक्षित वर्गलाइ मध्यनजर गरी यो योजना ल्याइएको वडा नम्बर ३ का अध्यक्ष हेमबहादुर कार्कीले बताए । समयमा नै आवास निर्माण गर्न ठेकदारलाइ जानकारी गराउँदै उनले म्याद थपका लागि वडाले सिफारिस नदिने बताए । समयमा काम गर्न नसक्ने हो भने ठेक्का नलिन उनले जनाए । ठेकेदारका कमजोरीका कारण गत वर्ष निर्माण सुरु गरिएका १८ वटा आवास हालसम्म निर्माण सम्पन्न नभएका कारण हस्तान्तरण हुन नसकेको उनले बताए ।
गत वर्ष नगरले वडा नम्बर ३ काे नयाँवस्तीमा १८ वटा आवास निर्माण सुरु गरेपनि ठेकेदारका कारण निर्माण सम्पन्न भइनसकेको नगर प्रमुख पोखरेलले बताए । उनले विषेश गरी लोप हुदै गएका सन्थाल जातिलाइ विस्थापित हुन नदिन यो योजना नगरले लागू गरेको जनाए । नगरभित्र रहेर नागरिकता पाएका ६३४ घर रहेको उनले जानकारी दिए । शिक्षा,स्वास्थ्य र रोजगारीमा पहुँच नपुगेको हुँदा नगरले निःशुल्क स्वास्थ्य बिमा गरिदिएको उनले बताए । अन्य समुदाय कमजोर रहेपनि समग्रमा सन्थाल समुदाय कमजोर देखिएकोले यो समुदायबाट नै आवास निर्माण सुरु गरिएको उनले बताए ।
नगरपालिकाले आवास निर्माण गरिदिने भएपछि ७८ वर्षिय चुड्कु किस्कु खुसी देखिएका थिए । जिवनभर घामपानी नछेक्ने घरमा जिविकोपार्जन गरिरहेको अवस्थामा नयाँ घर निर्माण हुने भएकोले सवैलाइ उनले धन्यवाद दिएका थिए । त्यसैगरी अर्का घरधनी लाल हस्दाले ङर बन्ने भएपछि सवै परिवारमा खुसी छाएकाे बताए । विभिन्न मापदणड पुरा गरेकालाइ पहिलाे चरणमा आवास निर्माण गर्ने नगरपालिकाले जनाएकाे छ ।
