झापा । झापाको मेचीनगर वडा नम्बर १२ को श्री पञ्चवटी वीरभद्र महाकाली धामका स्तरबृद्धिका लागि आयोजना गरिएको महायज्ञको आय ब्यय सार्वजनिक गरिएको छ । मंसीर १५ देखि २१ गतेसम्म आयोजना भएको श्रीमद् भागवत सप्ताह ज्ञान महायज्ञ, धन–धान्यञ्चल महापुराणको आम्दानी तथा खर्च बिहीवार पत्रकार सम्मेलन मार्फत सार्वजनिक गरिएको हो ।
महायज्ञबाट ४१ लाख २५ हजार ४२७ रुपैयाँ आम्दानी भएको र २३ लाख ३४ हजार ६८१ रुपैयाँ खर्च भएको आयोजक समितिले पत्रकार सम्मेलनमा जानकारी दिएको छ । जसमध्ये रसिद काटेर उठ्न बाँकि ६ लाख ८८ हजार २४५ रुपैयाँको रहेको पुराण आयोजक समितिले जनाएको छ । पुराण आयोजक मुल समारोह समितिले महायज्ञ स्थलमै पत्रकार सम्मेलनको आयोजना गरी आम्दानी र खर्च सार्वजनिक गर्दै सम्पूर्ण हिसाब मन्दिर ब्यवस्थापन समितिलाई हस्तान्तरण गरेको छ ।
पुराण मुल आयोजक समितिका अध्यक्ष तिलकप्रसाद गिरी र सचिव प्रेमराज घिमिरेले मन्दिर ब्यवस्थापनका अध्यक्ष इन्द्रमणि प्रसाई र सचिव सहदेव ढुङ्गानालाई खर्च तथा आम्दानीको बिल भौचरसहित हिसाव हस्तान्तरण गरेका थिए । महायज्ञमा प्रमुख कथा बाचकका रुपमा भागवत मञ्जरी राधिका दासी रहेकी थिइन् । पुराणबाट लक्ष्य अनुसार रकम संकलन नभएपनि समग्रमा पुराण सफल भएको अध्यक्ष गिरीले बताए ।
