झापा / आज विश्वभर “विश्व दूरसञ्चार तथा सूचना समाज दिवस” मनाइँदैछ। हरेक वर्ष मे १७ मा मनाइने यो दिवसले सूचना प्रविधि, इन्टरनेट तथा दूरसञ्चार सेवाको महत्वबारे जनचेतना फैलाउने उद्देश्य राखेको छ। यो दिवस सन् १८६५ मा International Telecommunication Union (ITU) स्थापना भएको सम्झनामा मनाउन थालिएको हो।
यस वर्षको नारा “Digital Lifelines: Strengthening Resilience in a Connected World” अर्थात् “डिजिटल जीवनरेखा : जोडिएको विश्वमा दिगोपन सुदृढीकरण” रहेको छ। ITU ले डिजिटल पूर्वाधार, इन्टरनेट सञ्जाल, स्याटेलाइट प्रणाली तथा डेटा सुरक्षालाई अझ भरपर्दो र सुरक्षित बनाउन विश्व समुदायलाई आह्वान गरेको छ।
संयुक्त राष्ट्रसंघअन्तर्गतको ITU का अनुसार आजको विश्वमा सञ्चार प्रणाली केवल सूचना आदानप्रदानको माध्यम मात्र नभई शिक्षा, स्वास्थ्य, विपद् व्यवस्थापन, बैंकिङ तथा सरकारी सेवाको आधार बनेको छ। त्यसैले डिजिटल प्रणालीमा आउने अवरोधले समाज र अर्थतन्त्रमा प्रत्यक्ष असर पार्ने भएकाले डिजिटल सुरक्षामा विशेष ध्यान दिनुपर्ने बताइएको छ।
नेपालमा पनि विभिन्न सरकारी तथा निजी संस्थाले सूचना प्रविधिको पहुँच विस्तार, डिजिटल साक्षरता र सुरक्षित इन्टरनेट प्रयोगबारे जनचेतनामूलक कार्यक्रम आयोजना गरी दिवस मनाइरहेका छन्। पछिल्ला वर्षहरूमा नेपालमा इन्टरनेट र मोबाइल सेवाको पहुँच तीव्र रूपमा बढे पनि ग्रामीण क्षेत्रमा गुणस्तरीय सेवा विस्तार अझै चुनौतीकै रूपमा रहेको विज्ञहरूले बताएका छन्।
