झापा । झापाको काँकडभिट्टाबाट सवाँ १२ लाख मूल्य बराबरको सुपारी बरामद गरिएको छ । राजस्व छली गरेर सुपारी ओसार पसार हुदै गरेको गोप्य सूचनाका आधारमा इलाका प्रहरी कार्यालय काँकडभिट्टाका डिएसपी भिम बहादुर लामाको नेतृत्वमा खटिएको प्रहरी टोलीले शुक्रबार दिउँसो पौने २ बजे मेचीनगर नगरपालिका ६ स्थित भट्टराइ चोकबाट सामान बरामद गरेको हो ।
प्रहरीले दिएको जानकारी अनुसार इटाभट्टाबाट काँकडभिट्टा तर्फ जादै गरेको प्रदेश १–०१–००१ च ७१२५ नम्बरको पिकअप बोलेरोमा चेकजाँच गर्दा भिसिटिएस पान बिलमा १२ लाख २५ हजार बराबरको बिल भएपनि आधिकारिक भिसिटिएस अनलाइन बिल नभएको फेला परेपछि सामानसहित गाडी नियन्त्रणमा लिएको जिल्लाका डिएसपी कृष्णकुमार चन्दले जानकारी दिए । उल्लेखित गाडीमा नेपालमा उत्पादित उसिनेको ५३ वटा बोरामा रहेको २३ सय ७८ किलो सुपारी बरामद गरिएको उनले जनाए । घटनापछि बोलेरो चालक झापा बुद्धशान्ती ३ का ४१ बर्षीय युवराज उप्रेतीलाइ समेत नियन्त्रणमा लिइ गाडीसहित बरामद गरिएको सुपारीलाइ आवश्यक अनुसन्धानका लागि राजस्व अनुसन्धान कार्यालय इटहरी पठाइएको उनले जानकारी दिए ।
