झापा / सडकपेटीमा आश्रित दृष्टिविहीनहरूले आफूहरूमाथि बलपूर्वक हटाउने, धरपकड गर्ने र वैकल्पिक व्यवस्था नगरी जीविकोपार्जनको बाटो बन्द गरिएको भन्दै सरकार र सम्बन्धित निकायविरुद्ध आन्दोलन सुरु गरेका छन्। उनीहरूले सोमबार काठमाडौंको माइतीघर मण्डलामा धर्ना तथा प्रदर्शन गरेका हुन्।
आन्दोलनमा सहभागी दृष्टिविहीनहरूले सडकपेटी, मठमन्दिर र सार्वजनिक स्थानमा गर्दै आएको स्वरोजगारसम्बन्धी काम गर्न नदिइएको आरोप लगाएका छन्। नगरप्रहरीबाट पटक–पटक धरपकड र जबरजस्ती भएको भन्दै उनीहरूले आक्रोश व्यक्त गरेका छन्।
आन्दोलनरत पक्षले राज्यले आफूहरूको जीविकोपार्जनको विकल्प दिनुपर्ने, योग्यता र क्षमताअनुसार रोजगारी उपलब्ध गराउनुपर्ने वा बेरोजगार भत्ताको व्यवस्था गर्नुपर्ने माग अघि सारेका छन्। वैकल्पिक व्यवस्था नगरिएसम्म आन्दोलन जारी रहने चेतावनी समेत उनीहरूले दिएका छन्।
प्रदर्शनकारीहरूको भनाइ छ कि जीविकोपार्जनको माध्यम बन्द गरेर मात्र समस्या समाधान नहुने र राज्यले सामाजिक सुरक्षा तथा सम्मानजनक जीवनयापनको आधार तयार गर्नुपर्ने आवश्यकता रहेको छ।
