झापा / बाँकेको नेपालगञ्जमा खसी किन्ने क्रममा भएको विवादपछि दुई समूहबीच झडप हुँदा एक जनाकाे मृत्यु भएकाे छ भने पाँच जना घाइते भएका छन् ।
जिल्ला प्रहरी कार्यालय बाँकेका अनुसार शुक्रबार बिहान एउटा समूहले खरिद गर्नको लागि बैना गरेको खसी अर्काे समूहले किनेपछि झडप हुँदा नेपालगञ्ज उपमहानगरपालिका–५ का ५२ वर्षीय जाबिद अली बेहनाको मृत्यु भएको हो।
विवादमा ढुंगा प्रहारकै क्रममा घाइते भएका जाबिदलाई अस्पताल पुर्याइएकोमा उपचारका क्रममा निधन भएको प्रहरीले बताएकाे छ । खसी बोका खरिद गर्ने दुई समूह आफन्त रहेको प्रहरीले बताएकाे हाे । साेही घटनामा अन्य ५ जना घाइते भएका छन् । ४ जना नेपालगन्जमा रहेको सञ्जीवनी मेडिकल कलेजमा उपचार पछि घर फर्किएका छन् भने एक जनालाई उपचारको लागि भारत लगिएको प्रहरीले बताएकाे हाे ।
