झापाको कन्काई नदीमा बगिरहेका एक बालकको उद्धार गरिएको छ। आज दिउँसो करिब २ बजे कनकाई नगरपालिका–२ भुरुङ्गा क्षेत्रमा रहेको कन्काई नदीमा बग्दै गरेको अवस्थामा बालकलाई स्थानीयवासीले देखेका थिए।
तत्कालै स्थानीयले बालकको उद्धार गरी नदी किनारमा ल्याएका थिए। प्रारम्भिक विवरणअनुसार ती बालकले आफ्नो नाम सुनिल लिम्बू बताएका छन् भने उनको उमेर करिब ९ वर्ष रहेको अनुमान गरिएको छ। उनको स्थायी ठेगाना भने खुल्न सकेको छैन।
घटनाको जानकारी पाएपछि इलाका प्रहरी कार्यालय सुरुङ्गाबाट प्रहरी वरिष्ठ नायव निरीक्षक रबि राईको नेतृत्वमा प्रहरी टोली घटनास्थल पुगेको थियो। उद्धारपछि बालकलाई उपचारका लागि कनकाई नगर अस्पताल, सुरुङ्गा पठाइएको छ।
प्रहरीका अनुसार बालकको अवस्था गम्भीर रहेको छ भने उनका आफन्तको खोजी कार्य जारी रहेको छ।
