सशस्त्र प्रहरीले सीमावर्ती झापा गाउँपालिकामा संचालन गरेको निःशुल्क स्वास्थ्य शिविरबाट २०५ जना लाभान्वित भएका छन् ।
झापा गाउँपालिका ४ स्थित डिल्लीराज माध्यमिक विद्यालयको प्राङ्गणमा आयोजित शिविरमा १३६ जना पुरुष र ६९ जना महिलाले स्वास्थ्य जाँच गराएका थिए । उनीहरुलाई स्वास्थ्य चेकजाँच गरी आवश्यक औषधि बितरणसमेत गरिएको सशस्त्र प्रहरी बल नेपाल नं. २ गण झापाका सूचना अधिकारी सशस्त्र प्रहरी नायव उपरीक्षक सुमन पोख्रेलले जानकारी दिएका छन् ।
सीमाबासीसंग सशस्त्र प्रहरी कार्यक्रम अन्तर्गत सशस्त्र प्रहरी बल, नेपाल नं.२ गण हे.क्वा. झापाको आयोजना तथा सशस्त्र प्रहरी बल, नेपाल फिल्ड अस्पताल पकली सुनसरीको प्राविधिक सहकार्यमा सो शिविर संचालन गरिएको थियो ।
सशस्त्र प्रहरी बल नेपाल नं. २ गण झापाका गणपति सशस्त्र प्रहरी उपरीक्षक अम्बिकाप्रसाद जोशीको प्रमुख आतिथ्यतामा सशस्त्र प्रहरी बल नेपाल फिल्ड अस्पताल पकलीबाट प्रा.सशस्त्र प्रहरी निरीक्षक डा. कुसुम श्रेष्ठको नेतृत्वमा ७ जना चिकित्सकसहितको टोलीले चेकजाँच गरेको थियो ।
कार्यक्रममा झापा गाउँपालिका वडा नं.२ का वडा अध्यक्ष हिमालकुमार चम्लागाई, वडा नं ४ का वडा अध्यक्ष महमद ताहिर,सशस्त्र प्रहरी बल नेपाल बिओपी टाघनडुब्बाका बिओपीपति सशस्त्र प्रहरी निरीक्षक नारायण तामाङ र बिओपी पन्थापाडाका सशस्त्र प्रहरी निरीक्षक दिनेश बम्जनलगायतको उपस्थिति रहेको थियो ।
