झापा / राष्ट्रिय स्वतन्त्र पार्टी (रास्वपा) को महिला सहमहामन्त्री पदमा निशा डाँगी निर्वाचित भएकी छिन्।
चितवनको भरतपुरमा जारी पार्टीको पहिलो ऐतिहासिक महाधिवेशन अन्तर्गत शुक्रबार सम्पन्न पदाधिकारी निर्वाचनको मतपरिणाम अनुसार डाँगी विजयी भएकी हुन्।
निर्वाचन समितिका अनुसार विजयी डाँगीले ७ सय ३७ मत प्राप्त गरेकी छिन्। महिला सहमहामन्त्रीका लागि डाँगीसँगै अन्य ४ जना उम्मेदवारहरू चुनावी प्रतिस्पर्धामा उत्रिएका थिए। उनले आफ्ना प्रतिस्पर्धीहरू जुली यादव, जमुना शर्मा (विदुषी), कामिनीकुमारी चौधरी र रिमा विश्वकर्मालाई पराजित गर्दै सो पद सुरक्षित गरेकी हुन्।
नवनिर्वाचित सहमहामन्त्री निशा डाँगी झापा क्षेत्र नम्बर १ बाट निर्वाचित प्रतिनिधि सभा सदस्य (सांसद) हुन्। यसअघि उनी कोशी प्रदेशबाट रास्वपाको केन्द्रीय सदस्य निर्वाचित भएकी थिइन् भने पार्टीको सचेतक र समानुपातिक सांसदका रूपमा समेत भूमिका निर्वाह गरिसकेकी छिन्।
रास्वपाको विधानमा ५ जना सहमहामन्त्री रहने व्यवस्था छ। जसमध्ये एक महिलासहित ३ खुला पदका लागि शुक्रबार निर्वाचन भएको हो भने बाँकी २ जना सहमहामन्त्री पार्टी सभापतिले मनोनीत गर्ने प्रावधान रहेको छ। महाधिवेशनको खुला सहमहामन्त्री पदमा भने हरि ढकाल र असिम शाह निर्वाचित भएका छन्।
यस महाधिवेशनमार्फत रास्वपाले नयाँ पदाधिकारीहरू चयन गर्दै आफ्नो संगठनात्मक संरचनालाई थप सुदृढ र व्यवस्थित बनाउने लक्ष्य लिएको छ। विजयी घोषणा भएसँगै नवनिर्वाचित पदाधिकारीहरूले महाधिवेशन हलमा पद तथा गोपनीयताको शपथ समेत ग्रहण गरिसकेका छन्।
